தென்காசி: செங்கோட்டை காவல் நிலைய எல்லைக்குள்பட்ட கலங்காதகண்டி பகுதியைச் சேர்ந்தவர் கனகராஜ். இவர் அதே பகுதியைச் சேர்ந்த ராஜ்(81), அவரது மகன் துரை(49) ஆகியோரை பரமக்குடியில் உள்ள செங்கல் சூளையில் வேலை செய்வதற்கு அவரது உரிமையாளரிடமிருந்து 10 ஆயிரம் ரூபாய் வாங்கிக் கொடுத்துள்ளார்.
ஆனால் தந்தை, மகன் இருவரும் பணத்தை வாங்கிக்கொண்டு வேலைக்கு வராமல் இருந்துள்ளனர். இந்நிலையில் கனகராஜ், இருவரிடமும் 'வேலைக்கு வாருங்கள் இல்லாவிட்டால் பணத்தை திருப்பிக் கொடுங்கள்' எனக் கேட்டுள்ளார். இதனால் இவர்களுக்கு இடையே விரோதம் இருந்து வந்துள்ளது.
நீதிமன்றம் தீர்ப்பு: இந்நிலையில், 2012ஆம் ஆண்டு அக்டோபர் 31ஆம் தேதி கனகராஜ், அவரது வீட்டின் முன்பு நின்று பேசிக்கொண்டிருந்தபோது, அங்குவந்த ராஜ், துரை இருவரும் அரிவாளால் கனகராஜை வெட்டியுள்ளனர்.
இதில் பலத்த காயமடைந்த கனகராஜ், செங்கோட்டை அரசு மருத்துவமனையில் அனுமதிக்கப்பட்டு, மேல் சிகிச்சைக்காக திருநெல்வேலி ஹைகிரவுண்ட் அரசு மருத்துவமனையில் சேர்க்கப்பட்டு, பின்னர் மதுரை ராஜாஜி மருத்துவமனையில் சிகிச்சைக்கு சேர்க்கப்பட்டார்.
எனினும், சிகிச்சை பலனின்றி 2012ஆம் ஆண்டு நவம்பர் 01ஆம் தேதி அவர் இறந்தார். பின்பு இது குறித்து செங்கோட்டை காவல் ஆய்வாளர் முனிஸ்வரன், மேற்படி குற்றவாளிகள் மீது வழக்குப்பதிவு செய்து நீதிமன்றத்தில் ஆஜர்படுத்தி சிறையில் அடைத்தார்.
இந்த வழக்கை நேற்று(ஏப். 11) தென்காசி மாவட்ட கூடுதல் அமர்வு நீதிமன்றத்தில் நீதிபதி அனுராதா விசாரணை மேற்கொண்டு, மேற்படி கனகராஜை கொலைசெய்த ராஜ், துரை ஆகிய இருவருக்கும் ஆயுள் தண்டனை, அபராதம் விதித்து தீர்ப்பு வழங்கினார்.
மேலும், அபராதம் கட்டத் தவறினால் கடுங்காவல் தண்டனை எனவும் தீர்ப்பளித்தார். வழக்கில் திறம்பட செயல்பட்ட அரசு வழக்கறிஞர் வேல்சாமிக்கும், செங்கோட்டை காவல் துறையினருக்கும், மாவட்ட காவல் கண்காணிப்பாளர் கிருஷ்ணராஜ் தனது வாழ்த்துகளை தெரிவித்துக்கொண்டார்.
இதையும் படிங்க: 'ஸ்ரீகாகுளம் ரயில் விபத்து : தண்டவாளத்தில் நின்ற பயணிகள் மீது மற்றொரு ரயில் மோதி 5 பேர் பலி'
